Tom Qab Tag Sim Neej Yuav Ua cas

Thaum Tag Sim Neej Peb Kev Cai Coj li Cas?

Qhia Kom Paub 1: Nyob ntuj qub qab lub teb chaws Nplog yog thaum muaj ib tug tag sim neej lawm tej laus yuav muab ib rab phom coj los lwm rau tus tag sim neej no me ntsis thiab coj tawm mus tua 3 phom ntawm qhov rooj tag tias yog tua phom ua nws luag (Tom qab no kuj tsis siv lawm vim hloov nom tswv ces yoog raws lub teb chaws txoj kev cai)

Qhia Kom Paub 2:  Nyob teb chaws Mes Kas peb cov kwv tij tsis siv qhov tua phom ua tus tag sim neej no luag tib yam nkaus vim ua raws nom tswv txoj kev cai uas tua tsis tau phom.

Qhia Kom Paub 3: Thaum tag sim neej lawm yuav muab tus tib neeg tag sim neej no coj los kho khaub ncaws rau nws hnav  uas tej laus hu tias: Muab Tu Zam

Cov Khoom yuav Siv:  

·      Rhaub ib fwj dej kom sov so

·      Dua ib daim ntaub dawb los yog ib txoj phuam dawb dawb coj los npaj yuav ntxuav tus tib neeg tag sim neej no ntsej muag thiab tej tes tej taw tag ua ntej mam muab khaub ncaws kho rau hnav.

·      Tus tag sim neej no yog tus poj niam  ces yuav muab ib lub kawm khwb rau hauv plag tsev cia nws zaum saum lub qab kawg 2-3 tug tub nyab los sib pab tuav, muab ntxuav muag , ntxuav tes taw tag ces mam kho ris tsho rau hnav.

·      Yog Tus Txiv Neej tag sim neej:  Ces muab ib lub rooj coj los tso rau ntawm plag tsev rau nws zaum 2-3 tug tub nyab los sib pab tuav, muab ntxuav muag , ntxuav tes taw tag ces mam kho ris tsho rau hnav.

Qhia Kom Paub: Peb nyob rau Mes Kas no nom tswv hloov lawm ces peb ywj raws ntawm lub tsev ua tus khaub ncaws rau tus tag sim neej hnav yog tias lawv yeej kho tau tiav tiav lawm ces thaum los txog muab nws xyab es yuav ua kev cai taw kev tej tub nyab mam muab txoj phuam los tub dej sov so coj los so nws ib lwm xwb.

(Txhua yam piav raws saum no tsis yog tias hloov lawm es ua tsis thooj li yav tag los, tsuas yog ywj raws lub tsam thawj tias koj nyob qhov chaw twg ces koj yuav tau ua raws xwb peb yeej tseem tsis tau hloov 1 qho txawv li)

             Thaum Tu Zam Tag ho Ua Li Cas Ntxiv?

Tu zam tag muab tus tag sim neej no coj mus xyab rau pem hauv plag - Taub hau tuaj puab tog rooj txuas ( Raws li nyob Nplog Teb : Yuav dai lub nruas rau sab phab ntsa puab ko taw uas yog qhov chaw cov laus feem ntau teeb lub qhov cos?.................................................Tab sis tuaj rau ntawm Mes kas teb no ces muaj qee zaus suav daws kuj ywj kev teeb lub nruas no raws li lub tsev txias ua dab ua qhua rau tus tag sim neej no seb luag ho muab lub tsev tig mus rov li cas lawm xwb.?.....................

Cov Cuab Yeej  Tsiaj Txhu coj los siv ua ntej  Yuav pib kev cai dab qhuas muaj li no:

1 tug txhib ntawg

9 Tug cwj mag cwj ntuag yog tias yog tus txiv neej (Peb tsis siv lub kaus ntawv peb tsuas siv raws li nqi 2 thiab3 no xwb).

7 Tug cwj mag cwj ntuag yog tias yog tus poj niam

1 lub qe coj los laig rau tus tag sim neej

1 lub nyuag kaus poom los yog lauj kaub me me ua ib qho mov me me

1 fwj cawv laig dab rau tus tag sim neej (peb tsis siv lub lam fwj uas laig cawv tag es hliv cov cawv rau hauv li lwm xeem neeg, thaum laig tas ces cia li ntov cov cawv rau hauv ib lub thoob nyob ib sab xwb los tau.

Cov nqaij cov mov uas laig rau tus tag sim neej ces hliv rau lub thoob os yog thawv uas ntim tus qaib.....?

1 tug lau qaib uas hu tias qaib rau ncoo

1 lub thoob los yog thawv ntawv coj los tso tus qaib hauv ncoo

1 rab hneev nti  thiab 3 xib xub (Yog tias tus tag sim neej yog tus txiv neej)

1 lub pub tsaig npua uas yog tus npua tsa nees khaws cia yuav tseg ncaws tsaig thaum muab  tus poj niam tag sim neej no kwv mus zais teeb rau ntawm qhov rooj tag rau tus txiv qeej ncaws kom vau hlo tawm rau sab nraum zoov.

1 rab hneev taub nrog 1 xib xub( Nqis no yuav tau nug seb siv los tsis siv)

1 tug npua tsa nees

Txiav ib co xov txheej npaj thaum tus txiv taw kev xa tus tag sim neej no hla mus rau cov teb chaws uas nws ib txwm tau nyob dhau los es yuav muab hlawv mus ua cov  dab tswv teb tswv chaw tsaug.

Txiav ntoo ua ib tug nees:  (Saib kom cov ntoo no txhob lov ntsis cov ntoo muaj li no: 2 tug loj ntev  ua qhov kom zoo kwv thiab khov coj los zoj tus tag sim neej. 3 tug luv , 1 tug tso hauv lub nrab tus nees , ob tug tuaj ob sab. Muab fiab 3 ntus ntawm tus nees no kom koj saib tias khov lawm no ces mam tsum).

*Cov lus  teev nqi 1 txog 15 no koj yuav tsum npaj kom tiav tag rau thawj hnub uas muab tus tag sim neej no pib ua dab ua qhua*

                   Cov Cuab Yeej & Khoom Siv Muaj Li Saum No Xwb

Txhais lus:

Txhib ntawg yog dab tsi? Txhib ntawg yog ib ya xyoob uas koj mus txiav los luaj nkaus li tus ntiv tes es muaj 1 lub pob quas hauv lub nrab, muab nws hliav ob tog, sab tov tuaj thiab sab tom no mus ces muab phua ua ob sab coj los ua tus kuam ntaus rau tus tag sim neej kom nws lees tej xyab tej ntawv thiab tej dej cawv uas tus cuab tsav laig rau nws.

Cwj Mag Cwj Ntuag Yog Dab Tsi? Yog ib tug pas uas koj muab txiav thiab phua nws me zog tus ntiv tes rhw qab ces koj mam ho muab phua me ntsis pem lub hau ces koj txiav ib co hlua maj kom ntev li ib ntiv tes , ntev zog los tau ces muab rhais rau ntawm tus hau pas uas koj phua,  yog tsis muaj hlua maj ces siv hlua hnab tsaj los tau ib yam nkaus. Tus pas no yuav ntev li 1 feej los yog 1 dos tawm me me,   los yog tias ntev li tus rawg koj noj fawm xwb los tau....................?

____________________________________

Nias Nov Rov Mus Nplooj 1- Loj